立即注册 登录
henghenglu 返回首页

问道品道小詹的个人空间 http://999jjj.tsrchy.com/?153 [收藏] [复制] [分享] [RSS]

日志

鱼缸日日跌不停,好友难免心不宁

热度 1已有 1186 次阅读2011-6-19 08:40 | 好友

 《小传日记》最近鱼缸一片愁云惨雾,缸友每日望住个市,基本上都系计下自己身家少咗几多,无晒心机。今日(17日)市况亦无例外,仍然系由开市沽到去收市。希腊债务牵连甚广,鱼缸轻微高开之后就一路下滑,当午后欧洲开埋市之后,鱼缸更加跟住一齐插,最多跌超过300点,收市跌257点,收报21695。国货指数就跌116点,造12045。

  计一计数,今个星期鱼缸再跌多超过3巴仙,亦系连续第五个星期下跌。跌到几时?无人会有答案,但愿望就个个有,最起码都希望「七翻身」。今日成交都唔细,录得760亿银。

  *6月非常绝7月望翻身?希债牵连广先沽谋后着*

  香江鱼缸嘅走势继续系我行我素,即系唔理美国升定跌,鱼缸都一样系跌,真系弱过药煲。先睇睇钱庄嘅消息,负责制订环球钱庄资本充足标准嘅巴塞尔银行监管委员会,早前推出「巴塞尔资本协定III」,要求核心资本充足率最少达到总资产7%。消息话,巴塞尔委员会正考虑,对于万一倒闭即会危害全球经济嘅大型银行,要求进一步提高,会将呢啲钱庄嘅资本充足率,额外再提高3﹒5个百分点。

  边只系大到不能倒?大象(00005)都肯定系其一,要再提高资本充足率,不外乎几招,一就系「抽水」、二就系「收水」。抽水,多数都会供股,对钱庄唔会系好消息;收水,主要都系派少啲息,咁更加系坏消息,缸友都唔会中意见到。大象今日就跌1巴仙埋单,创今年以来嘅新低。另外都有番咁上下规模嘅渣打(02888)亦跌0﹒6巴仙。

  *大象有压力大到不能倒,寿仔冇眼睇美林撑平保*

  另一个值得睇嘅板块就系祖国保险族。之前寿仔(02628)已经系一挫再挫,今日就继续畀大户「蹂躏」,连25蚊都守唔住,全日大跌4巴仙埋单,再创近年新低。寿仔跌,最主要就系佢地今年首五个月累计原保费收入有1665亿人仔,较去年同期仅升7﹒5%,而按月计,收入更有所下跌,成为大户沽货嘅借口。

  美林都帮保险族把脉,预计直至第四季为止,内地保险行业将维持疲弱并缺乏催化剂,未能获得重新评级。佢地睇得最好嘅系平保(02318),属于行业首选,H股目标价96﹒7银,主因其首5个月保费势头持续改善。平保今日跟市跌1﹒4巴仙,财险(02328)就各跌3巴仙。

  大只佬跌得最多嘅两只股份系联通(00762)同埋QQ(00700)。先讲QQ,最近其实无乜坏消息,不过股价就由210蚊水平,一路碌到今日190蚊都失守埋。睇个势,大有可能跌穿埋185蚊呢个近年嘅最强力支持位,想捞货嘅缸友真系要跌定啲。

  *联通与QQ捞货宜忍手,大美人利丰阿兰与阿瑞*

  另一只重插股就系联通,全日插水5﹒6巴仙,成交额仲有成30亿银。中国工信部电信研究院发布,截至5月底,号码携带试运行期间约有5万人完成携号转网业务。联通相关就自己话,联通喺试验期内占有优势。

  咁点解两只股唔系无消息就系有好消息,但股价都要跌?原因唔使多讲,肯定系大户走货所致。两只股都系近年来比较强势嘅股份,芬佬呢个时候要「骨水」,联通同QQ的确系首选。

  两只出口股都捱得几惨,大美人(00330)插低4巴仙,利丰(00494)亦跌4巴仙,两只股都创出近年新低。

  *A仔场脚软内银各走各,协鑫急反弹中冶忽异动*

  A仔场都系脚软软,唔见0﹒8巴仙散场。中字派跌势都系比较全面,大部分都系不留情面地畀人沽。中海发展(01138)挫4﹒2巴仙,神华(01088)、龙源(00916)就齐齐唔见约4巴仙。个别祖国钱庄跌势暂歇,建行(00939)同工行(01398)分别升0﹒5巴仙及0﹒3巴仙,民行(01988)亦都逆市涨1﹒1巴仙。插得伤嘅见到有招行(03968),挫2巴仙散场。

  升幅榜上面都有唔少缸友「熟口熟面」嘅份子。中投三宝之一嘅保利协鑫(03800)今日就吐气杨眉,大涨14巴仙。久久无上过榜嘅中冶(01618)涨6巴仙埋单。广深铁(00525)同埋卡姆丹克(00712)升超过5巴仙。

  *我爱八号仔小小超窝心,Prada订下限米兰站有落*

  今日唔少电讯族都捱沽,不过电盈(00008)就逆市反弹2巴仙,非常少见。升势可能系同主席与一众小股东关系缓和有关。今日股东大会,小小超都有出席,仲答咗唔少小股东问题,当中佢就继续为分拆电讯业务上市护航,佢强调以商业信托形式分拆,较以普通形式上市,能够录得更大公司价值,派息亦都可以增加。一众小股东都几满意佢嘅讲法,更有一直搞对抗嘅小股东着住「I Love PCCW」嘅Tee,小小超应该特别窝心。

  个市咁弱,新上市嘅个个都要接受现实,调整下个招股价先有望可以成功上市。国际名牌普拉达(Prada)(01913)有传以39﹒5银定价,属于调整招股范围后嘅下限。至于噚日上市嘅新秀丽(01910)今日就好番少少,涨0﹒6巴仙散场。今年以来超购最劲嘅米兰站(01150),今日再跌多4﹒2巴仙,继续创出新上市以来嘅新低。

  睇番啲缸外料,胡润研究院发布《2011胡润中国外来富豪榜》,一共有43位外来富豪财富超过10亿人仔,当中最有钱嘅系台湾顶新国际嘅魏应交家族,以财富400亿人仔成为外来首富,旺旺(00151)蔡衍明财富有380亿,排第二、第三就系观澜湖老板朱树豪家族,财富有260亿。假期愉快!请请!

  《编者按》本栏搜罗即日热门传闻,惟消息未经证实,《经济通》亦不保证内容之准确性

  本文只供参考之用,并不构成要约、招揽或邀请、诱使、任何不论种类或形式之申述或订立任何建议及推荐,读者务请运用个人独立思考能力自行作出投资决定,如因相关建议招致损失,概与《经济通》、编者及作者无涉。

路过

鸡蛋

鲜花
1

握手

雷人

刚表态过的朋友 (1 人)

评论 (0 个评论)

facelist doodle 涂鸦板

您需要登录后才可以评论 登录 | 立即注册

无图浏览|小黑屋|联系我们|广告报价|免责声明|商家合作|新手上路|手机访问|henghenglu ( 正在备案中 )  

GMT+8, 2024-3-28 22:52 , Processed in 0.195783 second(s), 16 queries .

Powered by Discuz! X3.2

© 2001-2013 Comsenz Inc.

返回顶部